សិក្ខាសាលាស្តីពី “ការផ្សព្វផ្សាយគោលការណ៍គ្រឹះនៃអនុសញ្ញាលុបបំបាត់រាល់ទម្រង់នៃ ការរើសអើងប្រឆាំងនារីភេទ (CEDAW) និង ការឆ្លើយតបនឹងការរាលដាល មេរោគអេដស៍ និង ជំងឺអេដស៍”
នាព្រឹកថ្ងៃទី១២ ធ្នូ ២០១៤ នៅទីស្តីការគណៈរដ្ឋមន្រ្តី ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជាអធិបតីនៅក្នុងពិធិបើកសិក្ខាសាលាស្តីពី “ការផ្សព្វផ្សាយគោលការណ៍គ្រឹះនៃ អនុសញ្ញាលុបបំបាត់រាល់ទម្រង់នៃការរើសអើងប្រឆាំងនារី ភេទ (CEDAW) និង ការឆ្លើយតបនឹងការរាលដាលមេរោគអេដស៍ និង ជំងឺអេដស៍”។ អញ្ជើញចូលរួមក្នុងសិក្ខាសាលានោះរួមមាន លោកជំទាវរដ្ឋលេខាធិការក្រសួងកិច្ចការនារី និងជាតំណាងក្រុមប្រឹក្សាជាតិដើម្បីស្រ្តី តំណាងអង្គការសហប្រជាជាតិដើម្បីស្រ្តី (UNWOMEN) ឯកឧត្តម លោកជំទាវជាអនុប្រធាន អគ្គលេខាធិការរងអាជ្ញាធរ និង ឯកឧត្តម លោកជំទាវ អស់លោក លោកស្រី ដែលជាវាគ្មិន និង គ្រូសម្របសម្រួល ព្រមទាំងមន្រ្តី និង បុគ្គលិក តាម ស្ថាប័ន និង អង្គការក្រៅរដ្ឋាភិបាលដែលពាក់ព័ន្ធ ប្រមាណជា ១៥០នាក់ ។
នៅក្នុងសុន្ទរកថាបើកកិច្ចប្រជុំ ឯ.ឧ. ទេសរដ្ឋមន្រ្តីបានមានប្រសាសន៍កោតសរសើរចំពោះ កិច្ចសហការនានាក្នុងការបញ្រ្ជាប និង បញ្ចូលយេនឌ័រនៅក្នុងការឆ្លើយតបជាតិប្រយុទ្ធនឹងជំងឺ អេដស៍ ក្នុងឆ្នាំ២០១៤នេះ ។ ឯ.ឧ. ទេសរដ្ឋមន្រ្តីបានបញ្ជាក់ជូនអង្គសិក្ខាសាលាអំពីការគាំទ្រខាង នយោបាយ និង ធនធាន យ៉ាងពេញទំហឹងពី សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ក្នុងការអនុវត្តអនុសញ្ញាស៊ី-ដ ឱ្យមានប្រសិទ្ធភាព ។
ឯ.ឧ.ទេសរដ្ឋមន្រ្តីបានផ្តល់អនុសាសន៍ ឱ្យអង្គសិក្ខាសាលាពិភាក្សាផ្លាស់ប្តូរយោបល់ដើម្បី ទទួលបាននូវព័ត៌មានថ្មីៗ ដែលអាចយកមកប្រើប្រាស់បានក្នុងការចូលរួមជាមួយអាជ្ញាធរជាតិ ប្រយុទ្ធនឹងជំងឺអេដស៍ក្នុងការរៀបចំយុទ្ធសាស្រ្តជាតិលើកទី៤ នៅដើមឆ្នាំ២០១៥ខាងមុខ ។ នៅទីបញ្ចប់ ឯ.ឧ.ទេសរដ្ឋមន្រ្តីក៏បានប្រសិទ្ធពរជូន សមាជិក សមាជិកដែលបានចូលរួម និង បានប្រកាសបើកអង្គសិក្ខាសាលា ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
