ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតីក្នុង ពិធីបើកកិច្ចប្រជុំពិគ្រោះយោបល់ស្តីពីការពង្រឹងប្រព័ន្ធសុខាភិបាល
នាព្រឹកថ្ងៃទី១១ ខែធ្នូ ឆ្នាំ២០១៤ នៅសណ្ឋាគារញ៉ូយក មានរៀបចំកិច្ចប្រជុំពិគ្រោះ យោបល់ស្តីពី ការពង្រឹងប្រព័ន្ធសុខាភិបាល ក្រោមអធិបតីភាព ឯ.ឧ. ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និង ជាប្រធានគណៈកម្មាធិការសម្របសម្រួលប្រចាំ កម្ពុជា (CCC)របស់មូលនិធិសកល ។ សិក្ខាសាលានេះធ្វើឡើងដើម្បីពិភាក្សា និងធ្វើការផ្លាស់ប្តូរយោបល់អំពីការរៀបចំកំណត់ បង្ហាញទស្សនៈការពង្រឹងប្រព័ន្ធសុខាភិបាល ក្នុងការរួមចំណែកយ៉ាងសកម្មក្នុងចលនាជាតិ និង សកលលោក ដើម្បីធ្វើឱ្យពិភពលោករួចចាកផុតពី ជំងឺអេដស៍ របេង និង គ្រុនចាញ់ ដែលមាន ការចូលរួមពីអ្នកតំណាង អង្គការសុខភាពពិភពលោក ក្រសួងស្ថាប័នដែលពាក់ព័ន្ធ ស្ថានទូត ដៃគូអភិវឌ្ឍន៍ សង្គមស៊ីវិល ទីប្រឹក្សាបច្ចេកទេស និង អ្នកជំនាញការនានា ។
មានប្រសាសន៍នៅក្នុងពិធីបើក ឯកឧត្តមទេសរដ្ឋមន្រ្តី អៀង មូលី បានលើកឡើងពីជោគ ជ័យនៅក្នុងដំណើរការនៃកិច្ចសន្ទនាប្រចាំប្រទេសរបស់ជំងឺរបេង និង គ្រុនចាញ់ ។ ឯកឧត្តមបាន គូសបញ្ជាក់ថា ចេញពីបទពិសោធន៍នោះ យើងអាចរៀបចំកំណត់បង្ហាញទស្សនៈការពង្រឹងប្រព័ន្ធ សុខាភិបាលមួយដែលអាចជួយឱ្យយើងចូលទៅកៀកអ្នកទទួលរងផលប៉ះពាល់ពីជំងឺ ប្រកបដោយ ប្រសិទ្ធភាព និង លទ្ធផលអតិបរមាទៅតាមតម្រូវការរបស់សហគមន៍ ។ ឯ.ឧ.ទេសរដ្ឋមន្រ្តីបានបន្តថា តាំងពីការបង្កើតក្នុងឆ្នាំ២០០២ មូលនិធិសកលបានឯកភាព ផ្តល់ថវិកាជំនួយចំនួន១៧ដល់កម្ពុជា ដែលមានចំនួនទឹកប្រាក់សរុបចំនួន ៤៥២លានដុល្លារ ក្នុង នោះទឹកប្រាក់ចំនួន ៣៧៥លានដុល្លារត្រូវបានផ្តល់ឱ្យមកទល់ពេលបច្ចុប្បន្ន ។ វិភាគទានរបស់ មូលនិធិសកលរួមចំណែកយ៉ាងធំធេងដល់ការឈានទៅសម្រេចគោលដៅអភិវឌ្ឍន៍សហស្សវត្សរ៍ ពាក់ព័ន្ធនឹងសុខាភិបាល ។
ឯ.ឧ.ទេសរដ្ឋមន្រ្តីបានបន្តសង្កត់ធ្ងន់ថា កិច្ចប្រឹងប្រែងនៅក្នុងវិមជ្ឈការ និង វិសហមជ្ឈការ នៃរាជរដ្ឋាភិបាលកម្ពុជា ក្នុងការផ្តល់មូលនិធិដល់បញ្ហាសង្គមនានាដូចជា សុខភាព និង អនាម័យ មាតា និង ទារក ត្រូវបានដាក់ទៅដល់កម្រិតឃុំ តាមរយៈផែនការវិនិយោគឃុំ ។ ស្របជាមួយវិធី សាស្រ្តដែលមានការច្នៃប្រឌិតនេះ ជាមួយនឹងការរៀបចំកំណត់បង្ហាញទស្សនៈអំពីមេរោគអេដស៍ អាជ្ញាធរជាតិប្រយុទ្ធនឹងជំងឺអេដស៍មានផែនការដាក់បញ្ចូលមេរោគអេដស៍/ជំងឺអេដស៍ ក្នុងផែនការ អភិវឌ្ឍន៍ឃុំ/ផែនការវិនិយោគឃុំ ដែលមានចំនួន ១៦២១ឃុំ នៅទូទាំងប្រទេស ដោយផ្តល់ថវិកាជា យុទ្ធសាស្រ្តមួយចំនួនដល់គ្រួសារដែលត្រូវការបំផុត។
នៅទីបញ្ចប់ ឯ.ឧ.ទេសរដ្ឋមន្រ្តីបានប្រសិទ្ធពរអ្នកចូលរួមទាំងអស់ នូវពុទ្ធពរទាំង៤ប្រការគឺ អាយុ វណ្ណៈ សុខៈ និង ពលៈ និង បានប្រកាសបើកកិច្ចប្រជុំ ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
