កិច្ចប្រជុំអាជ្ញាធរជាតិប្រយុទ្ធនឹងជំងឺអេដស៍ប្រចាំខែធ្នូ
អាជ្ញាធរជាតិប្រយុទ្ធនឹងជំងឺអេដស៍បានបើកកិច្ចប្រជុំថ្នាក់ដឹកនាំ និង មន្រ្តី/បុគ្គលិក ក្រោមឱវាទ ប្រចាំខែធ្នូ កាលពីព្រឹកថ្ងៃពុធ ទី៣ ខែធ្នូ ឆ្នាំ២០១៤ ។ កិច្ចប្រជុំនេះធ្វើឡើងក្រោមអធិបតីភាពរបស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ នៅទីស្នាក់ការនៃអាជ្ញាធរជាតិប្រយុទ្ធនឹងជំងឺអេដស៍ ក្នុងរាជធានីភ្នំពេញ ។ អញ្ជើញចូលរួមក្នុងកិច្ចប្រជុំនេះ រួមមានឯកឧត្តម លោកជំទាវអនុប្រធាន ឯកឧត្តមទីប្រឹក្សាអាជ្ញាធរ អគ្គលេខាធិការ អគ្គលេខាធិការរង ប្រធាន/អនុប្រធាននាយកដ្ឋាន និង មន្រ្តី/បុគ្គលិក របស់អាជ្ញាធរជាតិប្រយុទ្ធនឹងជំងឺអេដស៍ទាំងអស់ ព្រម ទាំង ឯ.ឧ. វេជ្ជ. មាន ឈីវុន តំណាងឯ.ឧ. ម៉ម ប៊ុនហេង អនុប្រធានទី១ អាជ្ញាធរ ។
កិច្ចប្រជុំបានផ្តោតលើរបៀបវារៈសំខាន់ៗចំនួន៤ គឺ ៖
- របាយការណ៍វឌ្ឍនភាពរបស់អគ្គលេខាធិការដ្ឋាន
- របាយការណ៍ និង ការវាយតម្លៃ ការរៀបចំទិវាពិភពលោកប្រយុទ្ធនឹងជំងឺអេដស៍
- របាយការណ៍ស្តីពីការអនុវត្តកម្មវិធីមូលនិធិសកល
- ផ្សេងៗ ។
ឯកឧត្តមទេសរដ្ឋមន្ត្រី បានសម្តែងការកោតសរសើរចំពោះកិច្ចខិតខំប្រឹងប្រែងបំពេញការងារក្នុងការប្រយុទ្ធនឹងជំងឺអេដស៍កន្លងមក ។ ឯកឧត្តមទេសរដ្ឋមន្ត្រីប្រធាន ក៏បានលើកទឹកចិត្ត ដល់ថ្នាក់ដឹកនាំ និង មន្រ្តី បុគ្គលិក អាជ្ញាធរជាតិប្រយុទ្ធនឹងជំងឺអេដស៍ទាំងអស់ ឱ្យបន្តខិតខំបំពេញការងារ ឱ្យកាន់តែល្អប្រសើរថែមទៀត កែលម្អនូវចំណុចខ្វះខាតដែលបានកើតមាននាពេលកន្លងមក ។
លើសពីនេះទៀត ឯកឧត្តមទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍ នៅបានផ្តល់ អនុសាសន៍នូវចំណុចមួយចំនួន ដែលពាក់ព័ន្ធការរៀបចំជាវីដេអូឯកសារផ្សព្វផ្សាយពីជំងឺអេដស៍ និង ស្រោមអនាម័យ ដោយសហការជាមួយក្រសួងព័ត៌មាន ស្ថានីយ ទូរទស្សន៍ និង ក្រុមហ៊ុន ស្រោមអនាម័យ ។
មុននឹងបញ្ចប់កិច្ចប្រជុំ ឯកឧត្តមទេសរដ្ឋមន្រ្តី បានផ្តល់ជាអនុសាសន៍ ៧ចំណុចដូចខាងក្រោម ៖
- អបអរសាទរចំពោះសមិទ្ធផលដែល អ.ជ.ប.ជ.អ ទទួលបានក្នុងរយៈពេលកន្លងមកដែលគួរ ជាទីពេញចិត្ត ដោយមានការចូលរួមពីមន្ត្រីរាជការគ្រប់លំដាប់ថ្នាក់នៃអាជ្ញាធរ ។
- លើកទឹកចិត្តមន្ត្រីរាជការគ្រប់លំដាប់ថ្នាក់ ឱ្យបន្តយកចិត្តទុកដាក់ពង្រឹងសាមគ្គីភាព ឯកភាព ផ្ទៃក្នុង គោរពឱ្យបានម៉ឺងម៉ាត់នូវវិន័យការងារ តាមលំដាប់ឋានានុក្រម គោរព ទាំងពេលធ្វើការ ឱ្យបានទៀតទាត់ ។
- បន្តការងារដែលកំពុងធ្វើ និង ខិតខំធ្វើឱ្យបានប្រកបដោយប្រសិទ្ធភាព និង ប្រសិទ្ធផល ។
- ណែនាំឱ្យការរៀបចំបេសកកម្មឱ្យបានត្រឹមត្រូវ តាមបទដ្ឋាន និង បទបញ្ជាដែលកំណត់ឡើង ដោយក្រសួងសេដ្ឋកិច្ច និង ហិរញ្ញវត្ថុ និង គោលការណ៍របស់មូលនិធិសាកលប្រសិនបើមាន។
- ណែនាំឱ្យមានការសន្សំសំចៃក្នុងការប្រើប្រាស់ទឹកភ្លើងម៉ាស៊ីនត្រជាក់ជាដើម ។
- ណែនាំឱ្យតាក់តែងលំអអគារអាជ្ញាធរ ឱ្យមានលក្ខណៈបន្ថែមជាមជ្ឈមណ្ឌលផ្សាយព័ត៌មាន អំពីជំងឺអេដស៍ ។
- ណែនាំឱ្យយកចិត្តទុកដាក់ផ្តល់ការអប់រំអំពីមេរោគអេដស៍ដល់យុវវ័យ កម្មករ កម្មការិនី ឱ្យបាន ទូលំទូលាយក្នុងការទប់ស្កាត់រលកទី២កុំឱ្យវិលមកវិញ ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
