National AIDS Authority

ចំនួនអ្នកទស្សនាគេហទំព័រ:

ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតី ក្នុងសន្និបាតប្រចាំឆ្នាំ២០១៤ របស់អាជ្ញាធរជាតិប្រយុទ្ធនឹងជំងឺអេដស៍

នាព្រឹកថ្ងៃទី២២ តុលា ២០១៤ នៅទីស្តីការគណៈរដ្ឋមន្រ្តី ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជាអធិបតីនៅក្នុងសន្និបាតប្រចាំឆ្នាំ២០១៤ របស់អាជ្ញាធរជាតិប្រយុទ្ធនឹងជំងឺអេដស៍ ដោយមានការចូលរួមពី ឯកឧត្តម លោកជំទាវ ជាអនុប្រធាន អគ្គលេខាធិការ អគ្គលេខាធិការរងអាជ្ញាធរ និង ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ និង អស់លោក លោកស្រី ដែលជាប្រធាន ព្រមទាំងអ្នកតំណាងគណៈកម្មា ធិការអេដស៍នៅតាមក្រសួង រដ្ឋលេខាធិការដ្ឋាន រាជធានី ខេត្ត ក្រុងនៅទូទាំងព្រះរាជាណាចក្រ កម្ពុជា មន្រ្តី និង បុគ្គលិក តាមស្ថាប័ន និង អង្គការក្រៅរដ្ឋាភិបាលដែលពាក់ព័ន្ធ ប្រមាណជា ១៥០នាក់ ។

របៀបវារៈនៃសន្និបាតនេះរួមមាន ៖

សុន្ទរកថាបើកសន្និបាតដោយ ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិ ប្រយុទ្ធនឹងជំងឺអេដស៍ (អ.ជ.ប.ជ.អ)។
របាយការណ៍វឌ្ឍនភាព សមិទ្ធផល និង ប្រសិទ្ធភាពប្រយុទ្ធនឹងជំងឺអេដស៍ ប្រចាំឆ្នាំ ២០១៤របស់អាជ្ញាធរជាតិប្រយុទ្ធនឹងជំងឺអេដស៍ដោយឯកឧត្ដមវេជ្ជ. ហោ ប៊ុនឡេងអគ្គលេខាធិការរង អ.ជ.ប.ជ.អ ។
បទបង្ហាញស្តីពី សមិទ្ធផលរបស់គណៈកម្មាធិការប្រយុទ្ធនឹងជំងឺអេដស៍រាជធានីភ្នំពេញ ដោយ លោកជំទាវប្រធានគណៈកម្មាធិការប្រយុទ្ធនឹងជំងឺអេដស៍រាជធានីភ្នំពេញ ។
បទបង្ហាញស្តីពី សមិទ្ធផលរបស់គណៈកម្មាធិការប្រយុទ្ធនឹងជំងឺអេដស៍ខេត្ដបាត់ដំបងដោយ អ្នកតំណាងប្រធានគណៈកម្មាធិការប្រយុទ្ធនឹងជំងឺអេដស៍ខេត្ដបាត់ដំបង ។
បទបង្ហាញស្តីពី សមិទ្ធផលរបស់គណៈកម្មាធិការប្រយុទ្ធនឹងជំងឺអេដស៍ខេត្ដបន្ទាយ មានជ័យ ដោយអ្នកតំណាងប្រធានគណៈកម្មាធិការប្រយុទ្ធនឹងជំងឺអេដស៍ខេត្ដបន្ទាយ មានជ័យ ។
បទបង្ហាញស្តីពី សមិទ្ធផលរបស់គណៈកម្មាធិការប្រយុទ្ធនឹងជំងឺអេដស៍ខេត្ដសៀមរាបដោយអ្នកតំណាងប្រធានគណៈកម្មាធិការប្រយុទ្ធនឹងជំងឺអេដស៍ខេត្ដសៀមរាប ។
បទបង្ហាញស្តីពីសមិទ្ធផលរបស់គណៈកម្មាធិកាប្រយុទ្ធនឹងជំងឺអេដស៍ខេត្ដកំពតដោយ ឯកឧត្ដមប្រធានគណៈកម្មាធិការប្រយុទ្ធនឹងជំងឺអេដស៍ខេត្ដកំពត ។
បទបង្ហាញស្តីពី សមិទ្ធផលរបស់គណៈកម្មាធិកាប្រយុទ្ធនឹងជំងឺអេដស៍ខេត្ដកោះកុង ដោយអ្នកតំណាងប្រធានគណៈកម្មាធិការប្រយុទ្ធនឹងជំងឺអេដស៍ខេត្ដកោះកុង ។
បទបង្ហាញស្តីពី សេចក្តីព្រាងសេចក្តីសម្រេចនៃកិច្ចប្រជុំរបស់អាជ្ញាធរជាតិប្រយុទ្ធនឹង ជំងឺអេដស៍ដោយឯកឧត្តមវេជ្ជ. ទា ផលា អនុប្រធាន អ.ជ.ប.ជ.អ ។
ប្រសាសន៍បូកសរុប និង ប្រកាសបិទសនិ្នបាតដោយ ឯកឧត្ដម អៀង មូលីទេសរដ្ឋមន្ដ្រី និង ជាប្រធានអាជ្ញាធរជាតិប្រយុទ្ធនឹងជំងឺអេដស៍ ។

នៅក្នុងសុន្ទរកថាបើកសន្និបាត ឯ.ឧ. ទេសរដ្ឋមន្រ្តីបានមានប្រសាសន៍សង្កត់ធ្ងន់លើ ភារកិច្ចការងារដែលបានបំពេញ និង សមិទ្ធផលដែលទទួលបានក្នុងរយៈពេលជិតមួយឆ្នាំកន្លងមក ដូចជា ៖

១) ការសហការរៀបចំសិក្ខាសាលាប្រចាំតំបន់អាស៊ីខាងត្បូង និង អាស៊ីបូព៌ាស្តីពី គំរូ ហិរញ្ញប្បទានកែលម្អថ្មីរបស់មូលនិធិសកល ដែលមានអ្នកចូលរួមប្រមាណជា ៣០០នាក់ មកពី២០ ប្រទេស និង ពីដៃគូបច្ចេកទេសមកពីអង្គការ UNAIDS, WHO និង UNDPព្រមទាំងអ្នកតំណាង មកពីក្រសួងពាក់ព័ន្ធនៃរាជរដ្ឋាភិបាលកម្ពុជាផងដែរ ។ យើងបានទទួលនូវការកោតសរសើរ និង អំណរគុណពីមូលនិធិសកល ដោយយើងបានចូលរួមសហការរៀបចំ ធ្វើឱ្យសិក្ខាសាលាមាន ដំណើរការប្រព្រឹត្តទៅដោយជោគជ័យ ។

២) ការចូលរួមក្នុងសន្និសីទអន្តរជាតិលើកទី២០ ស្តីពីជំងឺ អេដស៍ នៅម៉ែលប៊ន ប្រទេសអូស្រ្តាលី ដែលប្រទេសកម្ពុជាយើងបានទទួលការអបអរសាទរ និង កោតសរសើរពីសំណាក់អ្នកចូលរួម និង ជាពិសេសពីសាស្រ្តាចារ្យ សារ៉ូន ឡឺវីន (Sharon Lewin)សហប្រធានសន្នីសីទអន្តរជាតិលើកទី២០ ស្តីពីជំងឺអេដស៍ អំពីជោគជ័យរបស់កម្ពុជាយើងក្នុងការ ប្រយុទ្ធនឹងជំងឺអេដស៍។

៣) ដំណើរបេសកកម្មស្វែងយល់ពីស្ថានភាពបច្ចុប្បន្ន និង ការពិនិត្យ មើលសភាពការណ៍ផ្ទាល់នៅមូលដ្ឋាន នៅខេត្តឧត្តរមានជ័យ ព្រះវិហារ និង ស្ទឹងត្រែង កាលពី ខែមីនា និង ទៅខេត្តតាកែវ និង ខេត្តព្រះសីហនុ នៅក្នុងខែកញ្ញា និង តុលានេះ ។ ក្នុងនោះ យើងបានយល់ដឹងពីសេវាព្យាបាល ថែទាំ និង សង្គមកិច្ច ដែលជួយគាំទ្រដល់អ្នកជំងឺអេដស៍ ពីសំណាក់មន្រ្តីក្រសួងសុខាភិបាល បុគ្គលិក សង្គមស៊ីវិល និង អាជ្ញាធរមូលដ្ឋានថ្នាក់ក្រោមជាតិ ។ យើងក៏បានជួបនឹងករណី អ្នកផ្ទុកមេរោគដែលទទួលសេវាសុខាភិបាល និង នៅក្រៅសេវាដែលជា អ្នកជំងឺមិន បានចូលក្នុងប្រព័ន្ធព្យាបាល ។ តាមរយៈបទពិសោធន៍ផ្ទាល់នេះ យើងអាចសន្និដ្ឋាន បានថា យើងត្រូវការបន្តកិច្ចប្រតិបត្តិការពហុវិស័យឱ្យស៊ីជម្រៅថែមទៀត ដើម្បីប្រយុទ្ធនឹងជំងឺ អេដស៍ឱ្យមានប្រសិទ្ធភាព ។

ដោយមានការអនុញ្ញាតពីឯ.ឧ. ប្រធាន ឯ.ឧ. ហោ ប៊ុនឡេង បានធ្វើបទបង្ហាញលើ របៀប វារៈទី២ និង លោកជំទាវ ឯកឧត្តម និង អស់លោក ជាប្រធាន និង អ្នកតំណាងគណៈកម្មាធិការ ប្រយុទ្ធនឹងជំងឺអេដស៍មកពី រាជធានីភ្នំពេញ បាត់ដំបង បន្ទាយមានជ័យ សៀមរាប កំពត និង កោះកុង លើរបៀបវារៈទី៣, ៤, ៥, ៦, ៧ និង ៨ អំពីសមិទ្ធផលនានារបស់គណៈកម្មាធិការ ។

នៅក្នុងរបៀបវារៈទី៩ ឯកឧត្តមវេជ្ជ. ទា ផលា អនុប្រធាន អ.ជ.ប.ជ.អ បានធ្វើបទបង្ហាញ ស្តីពី សេចក្តីព្រាងសេចក្តីសម្រេចនៃកិច្ចប្រជុំរបស់អាជ្ញាធរជាតិប្រយុទ្ធនឹងជំងឺអេដស៍ ដើម្បីស្នើសុំ ការអនុម័តពីអង្គសន្និបាត ។

ឯ.ឧ.ទេសរដ្ឋមន្រ្តីបានមានប្រសាសន៍អំពី ទិសដៅការងាររបស់អាជ្ញាធរសម្រាប់ឆ្នាំ២០១៥ ចំនួន១០ចំណុច ដែលមានដូចជា ៖

បន្តអនុវត្តការងារជាមួយដៃគូអភិវឌ្ឍន៍ និង បន្តអនុវត្តគោលនយោបាយ៧ចំណុចរបស់ រាជរដ្ឋាភិបាលឱ្យមានប្រសិទ្ធភាពខ្ពស់ថែមទៀតដោយ ៖
1. ជំរុញឱ្យមានការប្រើស្រោមអនាម័យកាន់តែទូលំទូលាយឱ្យបានរហូត១០០% ។
2. ធ្វើផែនទីភូមិសាស្រ្តនៃតំបន់ដែលមានហានិភ័យដោយសារមេរោគអេដស៍ និង ជំងឺអេដស៍ ។
3. ជំរុញឱ្យមានការធ្វើតេស្តឈាមយ៉ាងទៀងទាត់ និង ជាប្រចាំ ជាពិសេសនៅតាម តំបន់ប្រកបដោយហានិភ័យដោយសារមេរោគអេដស៍ និង ជំងឺអេដស៍ ។
4. ជំរុញឱ្យមានការអប់រំស៊ីជម្រៅអំពីសុវត្ថិភាពនៃការរួមភេទ ដល់ក្រុមយុវវ័យ កម្មករ កម្មការិនី តាមគ្រប់វិធីសាស្រ្ត រួមទាំងតាមវិធីសាស្រ្តដែលធ្លាប់ធ្វើពីមុន មកមានការរៀបចំ គ្រូបង្គោល និង មិត្តអប់រំមិត្តជាដើម ។
5. ជំរុញឱ្យមានយន្តការច្បាស់លាស់ ដើម្បីតាមដានការផ្តល់សេវាព្យាបាលដល់ អ្នកផ្ទុកមេរោគអេដស៍ដែលធ្វើចំណាកស្រុក ។
6. បញ្ចូលការប្រយុទ្ធនឹងជំងឺអេដស៍ទៅក្នុងគោលនយោបាយភូមិ-ឃុំមានសុវត្ថិភាព
ពង្រឹងកិច្ចសហប្រតិបត្តិការជាមួយដៃគូអភិវឌ្ឍន៍រួមទាំងភ្នាក់ងារនានានៃអង្គការសហ ប្រជាជាតិដើម្បីគៀងគររកជំនួយពីសហគមន៍អន្តរជាតិសម្រាប់កម្មវិធីប្រយុទ្ធនឹងជំងឺ អេដស៍ និង ដើម្បីប្រើប្រាស់ជំនួយអន្តរជាតិប្រកបដោយប្រសិទ្ធភាព និង ប្រសិទ្ធផល។
ត្រៀមពិភាក្សាជាមួយក្រសួងសេដ្ឋកិច្ចនិងហិរញ្ញវត្ថុដើម្បីបង្កើនថវិកាជាតិក្នុងការប្រយុទ្ធនឹងជំងឺអេដស៍ ។
ត្រៀមដាក់បេក្ខភាពរបស់ប្រទេសកម្ពុជាដើម្បីរៀបចំសមាជអន្តរជាតិស្តីពីជំងឺអេដស៍នៅអាស៊ី និង ប៉ាស៊ីហ្វិក លើកទី១៣ (ICAAP13: 13th International Congress on AIDS in Asia and the Pacific)នៅរាជធានីភ្នំពេញ នៅឆ្នាំ២០១៧ ។
ត្រៀមរៀបចំមជ្ឈមណ្ឌលព័ត៌មានអំពីមេរោគអេដស៍(AIDS Information Center)នៅ ក្នុងអាជ្ញាធរជាតិប្រយុទ្ធនឹងជំងឺអេដស៍ ។
ចូលរួមចែករំលែក ឬផ្លាស់ប្តូរបទពិសោធន៍នៅក្នុងកិច្ចប្រជុំអន្តរជាតិ ។
បន្តស្វែងយល់ និង តាមដានរាល់ការផ្តល់សេវាព្យាបាលសេវាថែទាំសេវាផ្នែកសង្គម កិច្ចនិងការគាំទ្រគ្រប់យ៉ាងដែលត្រូវផ្តល់ជូនអ្នកផ្ទុកមេរោគអេដស៍ និង អ្នកជំងឺ អេដស៍ឱ្យបានទៀតទាត់ និង ត្រឹមត្រូវ ។
បន្តស្រាវជ្រាវ និង ស្វែងយល់អំពីគម្លាតរវាងចំនួនអ្នកត្រូវទទួលសេវាព្យាបាល និង ចំនួនអ្នកកំពុងទទួលសេវាព្យាបាលជំងឺអេដស៍ ។
បន្តស្វែងយល់អំពីមូលហេតុដែលមានអ្នកជំងឺអេដស៍ក្រៅប្រព័ន្ធ តាមដាន និង ព្យាបាល ។
ពង្រឹងតួនាទីរបស់គណៈកម្មាធិការប្រយុទ្ធនឹងជំងឺអេដស៍គ្រប់លំដាក់ថ្នាក់ ។

ឯ.ឧ.ទេសរដ្ឋមន្រ្តីបានមានប្រសាសន៍ ថ្លែងអំណរគុណចំពោះវត្តមាន សមាជិក សមាជិកា ទាំងអស់ និង ប្រកាសបិទកិច្ចប្រជុំពេញអង្គនៅម៉ោង ១៣៖០០ រសៀល ព្រមទាំងបានអញ្ជើញ អ្នកចូលរួមទាំងអស់ពិសាអាហារសាមគ្គី។ សម្រាប់ឯកសារនៃកិច្ចប្រជុំ (របៀបវារៈ សន្ទរកថា បទបង្ហាញ...) សូមចុច ត្រង់នេះ...។

កម្រងរូបភាពនៃកិច្ចប្រជុំ៖

ឯកសារសម្រាប់ទាញយក

ចំណងជើង	ទំហំ	ការទាញយកឯកសារ
សន្ទរកថាឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ថ្លែងក្នុងសន្និបាតប្រចាំឆ្នាំ ២០១៤ របស់អាជ្ញាធរជាតិប្រយុទ្ធនឹងជំងឺអេដស៍	0.24 MB

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច