ឯ.ឧ. ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និង ជាប្រធានគណៈកម្មាធិការសម្របសម្រួលប្រចាំប្រទេសកម្ពុជា អញ្ជើញជាអធិបតីបើក កិច្ចប្រជុំពិគ្រោះយោបល់អំពីជំងឺរបេង ៖ កិច្ចសន្ទនាប្រចាំប្រទេសឆ្នាំ២០១៤
នាព្រឹកថ្ងៃទី២២ ខែឧសភា ឆ្នាំ២០១៤ ឯ.ឧ. ទេសរដ្ឋមន្រ្តី អៀង មូលី ប្រធាន អាជ្ញាធរជាតិប្រយុទ្ធនឹងជំងឺអេដស៍ ក្នុងឋានៈជាប្រធានគណៈកម្មាធិការសម្របសម្រួល ប្រចាំប្រទេសកម្ពុជា ដែលជាស្ថាប័នសម្របសម្រួលដល់ការដឹកនាំអនុវត្តគម្រោងជំនួយ របស់មូលនិធិសកលប្រចាំកម្ពុជាលើជំងឺអេដស៍ របេង និង គ្រុនចាញ់ បានអញ្ជើញ ជាអធិបតីបើកកិច្ចប្រជុំពិគ្រោះយោបល់អំពីជំងឺរបេង ៖ កិច្ចសន្ទនាប្រចាំប្រទេសឆ្នាំ២០១៤ នៅសណ្ឋាគារ តារាអ៊ែរផត រាជធានីភ្នំពេញ ។
បន្ទាប់ពីសម្តែងនូវការស្វាគមន៍ និង ថ្លែងអំណរគុណចំពោះអ្នកចូលរួមកិច្ចប្រជុំមក ឯ.ឧ. ទេសរដ្ឋមន្រ្តីបានគូសបញ្ជាក់ថា កិច្ចប្រជុំដែលរៀបចំរយៈពេលពីរថ្ងៃនេះ ធ្វើឡើង ដើម្បីពិគ្រោះយោបល់អំពីជំងឺរបេង ដែលជាកិច្ចសន្ទនាប្រចាំប្រទេសកម្ពុជាឆ្នាំ២០១៤ ក្នុង ការរកឱ្យឃើញអតិភាវូបនីយកម្មសកម្មភាពសម្រាប់កំណត់បង្ហាញទស្សនៈ ។ ក្រុមការងារ ចំនួន១២ នឹងត្រូវបង្កើតឡើងដើម្បីពិភាក្សាលើសេចក្តីព្រាងកំណត់បង្ហាញទស្សនៈនោះ ។
ឯ.ឧ.ទេសរដ្ឋមន្រ្តីបានបន្តថា ហិរញ្ញប្បទានបណ្តោះអាសន្នសម្រាប់ជំងឺរបេងដែល មានចំនួន ៣លានដុល្លារអាម៉េរិក អាចបន្តដំណើរការរហូតដល់ដំណាច់ឆ្នាំ២០១៤ ក៏ប៉ុន្តែ ការរៀបចំឱ្យមាននូវកំណត់បង្ហាញទស្សនៈ ដែលមានលក្ខណៈស្តង់ដារមួយនឹងបន្តធានា ឱ្យមាននូវការផ្តល់ហិរញ្ញប្បទានសម្រាប់រយៈពេល ៣ឆ្នាំខាងមុខទៀត ។ ដូច្នេះដើម្បី ជៀសវាងនូវការកាត់ផ្តាច់ហិរញ្ញប្បទានគណៈកម្មាធិការសម្របសម្រួលប្រចាំប្រទេសបាន សម្រេចដាក់ជូននូវកំណត់បង្ហាញទស្សនៈពេញលេញមួយ ទៅមូលនិធិសកលឱ្យបានមុន ថ្ងៃទី១៥ ខែមិថុនា ឆ្នាំ២០១៤ ដែលជាជម្រើសមួយអាចនឹងសម្រេចបាន ។
នៅទីបញ្ចប់ឯ.ឧ.ទេសរដ្ឋមន្រ្តីបានផ្តល់អនុសាសន៍ឱ្យ សមាជិក-សមាជិកាអង្គប្រជុំ ដែលមកពីក្រសួងស្ថាប័ននៃរាជរដ្ឋាភិបាលកម្ពុជា អង្គភាពថ្នាក់ក្រោមជាតិ តំណាងសហ គមន៍ ប្រជាជនដែលប៉ះពាល់សំខាន់ៗ គណៈកម្មាធិការសម្របសម្រួលប្រចាំប្រទេស និង ដៃគូពាក់ព័ន្ធ ផ្តល់នូវធាតុចូលដែលមានសារៈសំខាន់ដើម្បីរួមចំណែក ក្នុងការប្រយុទ្ធនឹង ជំងឺរបេងដ៏កំណាច ធ្វើយ៉ាងណាឱ្យយើងរៀបចំបាននូវកំណត់បង្ហាញទស្សនៈអំពីជំងឺរបេង ដ៏សមស្របក្នុងការធានានូវការទទួលបានហិរញ្ញប្បទានពីមូលនិធិសកល ដើម្បីប្រយុទ្ធនឹង ជំងឺរបេង សម្រាប់រយៈពេល ៣ឆ្នាំខាងមុខបន្តទៀត ។
ឯ.ឧ. ទេសរដ្ឋមន្រ្តីបានប្រសិទ្ធពរជ័យជូនដល់សមាជិក-សមាជិកអង្គប្រជុំ និងបាន ប្រកាសបើកកិច្ចប្រជុំពិគ្រោះយោបល់អំពីជំងឺរបេង ៖ កិច្ចសន្ទនាប្រចាំប្រទេសឆ្នាំ២០១៤។
ឯកសារសម្រាប់ទាញយក
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
សុន្ទរកថារបស់ ឯកឧត្តមទេសរដ្ឋមន្រ្តី អៀង មូលី ប្រធានគណៈកម្មាធិការសម្របសម្រួលប្រចាំប្រទេស ក្នុងកិច្ចប្រជុំពិគ្រោះយោបល់អំពីជំងឺរបេង៖ កិច្ចសន្ទនាប្រចាំប្រទេសឆ្នាំ២០១៤