ឯ.ឧ. ទេសរដ្ឋមន្រ្តី អៀង មូលី និងលោកជំទាវ អញ្ជើញជាអធិបតីក្នុងពិធីអបអរសាទរឆ្នាំថ្មី ប្រពៃណីជាតិ ឆ្នាំមមី ឆស័ក ព.ស. ២៥៥៨
នារសៀលថ្ងៃទី១០ មេសា ២០១៤ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺអេដស៍ ឯ.ឧ.ទេសរដ្ឋមន្រ្តី អៀង មូលីប្រធានអាជ្ញាធរជាតិប្រយុទ្ធនឹងជំងឺអេដស៍ និងលោកជំទាវ ព្រមទាំង អនុប្រធាន ទីប្រឹក្សា អគ្គលេខាធិការ អគ្គលេខាធិការរង និងមន្រ្តីរាជការក្រោមឱវាទបាន ចូលរួមក្នុងពិធីសូត្រមន្តអបអរសាទរឆ្នាំថ្មីប្រពៃណីជាតិ ឆ្នាំមមី ឆស័ក ពុទ្ធសករាជ២៥៥៨។
បន្ទាប់ពីពិធីសូត្រមន្ត ឯ.ឧ.ប្រធានបានមានមតិសំណេះសំណាលដោយបានថ្លែងកោត សរសើរដល់ថ្នាក់ដឹកនាំមន្រ្តីរាជការអាជ្ញាធរទាំងអស់ដែលបានយកចិត្តទុកដាក់បំពេញភារកិច្ចតាម តួនាទីរៀងៗខ្លួនរហូតបានជោគជ័យសំខាន់ៗក្នុងរយៈពេល១ឆ្នាំកន្លងមកដូចជាការបង្កើតក្រុមការ ងារយុទ្ធសាស្រ្តជាតិ ការធ្វើវិបស្សនាដែលនាំឱ្យយើងចេះពង្រឹងឯកភាព ចេះស្រលាញ់រាប់អានគ្នាមានភាពស្រស់ស្រាយ និងជាពិសេសព្រមទាំងការធ្វើបច្ចុប្បន្នភាពគេហទំព័ររបស់អាជ្ញាធរ ។ ឯ.ឧ.ទេសរដ្ឋមន្រ្តីបាន លើកយកការរៀបចំថ្មី និង វិន័យការងារនៅក្នុងអាជ្ញាធរមកផ្សព្វផ្សាយ ដោយសង្កត់ធ្ងន់លើសមត្ថភាពនៃមន្រ្តីរាជការដែលត្រូវបង្ហាញជាប្រចាំតាមការកែទម្រង់ស៊ីជម្រៅរបស់រាជរដ្ឋាភិបាល ដើម្បីឈានទៅសម្រេចតាមយុទ្ធសាស្រ្តចតុកោណដំណាក់កាលទី៣ ក្រោមការដឹកនាំដ៏ឈ្លាសវៃរបស់ សម្តេចតេជោ នាយករដ្ឋមន្រ្តី។
ឯ.ឧ. ទេសរដ្ឋមន្រ្តីឆ្លៀតក្នុងឱកាសដ៏ប្រពៃនេះ ប្រសិទ្ធិពរជូនថ្នាក់ដឹកនាំ និង មន្រ្តីរាជការ ទាំងអស់នៃអាជ្ញាធរជាតិប្រយុទ្ធនឹងជំងឺអេដស៍ សូមឱ្យទេវតាឆ្នាំថ្មីព្រះនាមគោរាគៈទេវីឆ្នាំមមី ឆស័ក ដែលនឹងចូលមកកាន់តំណែងនាពេលដ៏ខ្លីខាងមុខនេះ នាំមកនូវពរជ័យ ជូនថ្នាក់ដឹកនាំ ព្រមទាំងមន្រ្តីអាជ្ញាធរជាតិប្រយុទ្ធនឹងជំងឺអេដស៍ទាំងអស់ ឱ្យមានសុខភាពល្អ កម្លាំងកាយមាំមួន ប្រាជ្ញាវៀងវៃ និង មានជោគជ័យក្នុងការបំពេញការងារ និង គ្រួសារ ។
បន្ទាប់មក ក៏មានពិធីជប់លៀងអាហារសាមគ្គីដែលបានប្រព្រឹត្តទៅក្រោមបរិយាកាសស្និទ្ធស្នាល និងភាតរភាព ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
