National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្ត្រី អៀង មូលី ទទួលជួបសន្ទនាការងារជាមួយនាយិកាអង្គការយូអិនអេដស៍ប្រចាំប្រទេសកម្ពុជា ឡាវ និងម៉ាឡេស៊ី

នៅព្រឹកថ្ងៃចន្ទ ១១រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែកញ្ញា ឆ្នាំ២០២៣ ចាប់ពីម៉ោង៩ នៅអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរបានទទួលជួបសន្ទនាការងារជាមួយលោកស្រី ប៉ាទ្រីស្យា អុងពីន (Patricia Ongpin) នាយិកាអង្គការយូអិនអេដស៍ប្រចាំប្រទេសកម្ពុជា ឡាវ និងម៉ាឡេស៊ី។ ចូលរួមក្នុងកិច្ចសន្ទនានេះមានឯកឧត្តមអនុប្រធាន អគ្គលេខាធិការ នាយកខុទ្ទកាល័យ និងមន្រ្តីយូអិនអេដស៍។

ប្រធានបទនៃកិច្ចពិភាក្សាបានផ្តោតលើចំណុចសំខាន់ៗដូចតទៅ ៖
- ការចូលរួមរបស់ព្រះរាជាណាចក្រកម្ពុជាក្នុងកិច្ចប្រជុំក្រុមប្រឹក្សាសម្របសម្រួលកម្មវិធីរបស់អង្គការយូអិនអេដស៍ (UNAIDS PCB) នៅទីក្រុងហ្សឺណែវ ប្រទេសស្វ៊ីស
- សេចក្តីប្រកាសរបស់ប្រទេសអាស៊ានស្តីពីជំងឺអេដស៍
- គោលនយោបាយបញ្ចប់អេដស៍ និងចីរភាពកម្មវិធីអេដស៍
- ការអង្កេតថ្នាក់ជាតស្តីអំពីការចំណាយក្នុងការឆ្លើយតបនឹងមេរោគអេដស៍ និងជំងឺអេដស៍ និងផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ លើកទី៦
- យន្តការសម្របសម្រួលការឆ្លើយតបជាពហុវិស័យទៅនឹងជំងឺអេដស៍

ជាកិច្ចចាប់ផ្តើម លោកស្រី ប៉ាទ្រីស្យា អុងពីន (Patricia Ongpin) បានថ្លែងអំណរសាទរចំពោះឯកឧត្តមទេសរដ្ឋមន្រ្តី ដែលបានទទួលការទុកចិត្តពីថ្នាក់ដឹកនាំកម្ពុជាឱ្យបន្តដឹកនាំអាជ្ញាធរជាតិប្រយុទ្ធនឹងជំងឺអេដស៍ ក្នុងរាជរដ្ឋាភិបាលថ្មី នីតិកាលទី៧នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។ លោកស្រីនាយិកាបានជូនពរឯកឧត្តមទេសរដ្ឋមន្រ្តីឱ្យបានទទួលជោគជ័យថ្មីៗថែមទៀតក្នុងការប្រយុទ្ធនឹងជំងឺអេដស៍ នៅក្នុងអាណត្តិថ្មីដែលទើបចាប់ផ្តើមនេះ។

ពាក់ព័ន្ធនឹងកិច្ចប្រជុំក្រុមប្រឹក្សាសម្របសម្រួលកម្មវិធីរបស់អង្គការយូអនិអេដស៍ (UNAIDS PCB) លោកស្រី ប៉ាទ្រីស្យា អុងពីន បានជម្រាបជូនឯកឧត្តមទេសរដ្ឋមន្រ្តីថា កិច្ចប្រជុំនេះនឹងធ្វើនៅ ទីក្រុងហ្សឺណែវ ប្រទេសស្វ៊ីស ចាប់ពីថ្ងៃទី១២ ដល់១៤ ខែធ្នូ ឆ្នាំ២០២៣។ នេះជាអង្គប្រជុំវគ្គទី២ បន្ទាប់ពីវគ្គទី១ ដែល បានប្រព្រឹត្តទៅកាលពីថ្ងៃទី២៦-២៨ ខែមិថុនា ឆ្នាំ២០២៣ ហើយដែលនឹងលើកយកប្រធានបទអំពីការធ្វើតេស្តឈាមរកមេរោគអេដស៍ និងអំពីមេរោគអេដស៍ (HIV)។ លោកស្រី នាយិកាបានសម្តែងការកោតសរសើរចំពោះគណៈប្រតិភូកម្ពុជា ដែលបានចូលរួមយ៉ាងសកម្មនៅក្នុងកិច្ចប្រជុំវគ្គទី១ និងដែលបានលើកមតិជួយតម្រង់ផ្លូវក្នុងការពង្រឹងការងាររបស់អង្គការយូអិនអេដស៍ ក៏ដូចជាចែករំលែកបទពិសោធន៍ក្នុងការប្រយុទ្ធនឹងជំងឺអេដស៍នៅព្រះរាជាណាចក្រកម្ពុជា។ ត្រង់ចំណុចនេះ ឯកឧត្តមទេសរដ្ឋមន្រ្តីបានជម្រាបជូនដៃគូសន្ទនាថា ឯកឧត្តមទេសរដ្ឋមន្រ្តីនឹងដឹកនាំផ្ទាល់នូវ គណៈប្រតិភូកម្ពុជាចូលរួមក្នុងកិច្ចប្រជុំវគ្គទី២ នៅទីក្រុងហ្សឺណែវ។

ទាក់ទងនឹងការអង្កេតថ្នាក់ជាតិស្តីអំពីការចំណាយក្នុងការឆ្លើយតបនឹងមេរោគអេដស៍ និងជំងឺអេដស៍ និងការរៀបចំផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍លើកទី៦ ឯកឧត្តមទេសរដ្ឋមន្រ្តីបានបញ្ជាក់ថា អាជ្ញាធរជាតិប្រយុទ្ធនឹងជំងឺអេដស៍នឹងពិគ្រោះយោបល់ជាមួយអង្គការយូអិនអេដស៍ ដើម្បីរៀបចំឯកសារទាំង២នេះ។ ក៏ប៉ុន្តែ កិច្ចការជាបន្ទាន់នោះ អាជ្ញាធរជាតិប្រយុទ្ធនឹងជំងឺអេដស៍ត្រូវរៀបចំឱ្យហើយនូវសេចក្តីព្រាងគោលនយោបាយជាតិលុបបំបាត់អេដស៍នៅឆ្នាំ២០២៥ និងចីរភាពនៃកម្មវិធីអេដស៍ ឆ្នាំ២០២៣-២០២៨ ដើម្បីជូនគណៈរដ្ឋមន្រ្តីថ្មីអនុម័ត។ គោលនយោបាយជាតិលុបបំបាត់អេដស៍ និងចីរភាពកម្មវិធីអេដស៍ ជាមូលដ្ឋានគ្រឹះនៃការរៀបចំការវាយតម្លៃអំពីចំណាយ និងជាត្រីវិស័យនៃការរៀបចំផែនការយុទ្ធសាស្រ្តជាតិឆ្លើយតបនឹងជំងឺអេដស៍ លើកទី៦។

ជាថ្មីម្តងទៀត លោកស្រី ប៉ាទ្រីស្យា អុងពីន បានបញ្ជាក់ថា អង្គការយូអិនអេដស៍នឹងផ្តល់ការ គាំទ្របច្ចេកទេស និងកិច្ចសហការជិតស្និទ្ធជាមួយអាជ្ញាធរជាតិប្រយុទ្ធនឹងជំងឺអេដស៍ ដើម្បីជួយជំរុញការប្រយុទ្ធនឹងជំងឺអេដស៍នៅកម្ពុជាឱ្យបានសម្រេចជោគជ័យតាមកាលកំណត់របស់រាជរដ្ឋាភិបាល។

កិច្ចសន្ទនាបានបញ្ចប់ក្នុងបរិយាកាសស្និទ្ធស្នាល រាក់ទាក់ និងប្រកបដោយផ្លែផ្កាជាទីបំផុត។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច