បន្ទាប់ពីបានបំពេញការងារ រយៈកាលមួយឆ្នាំ២០១៧នេះ ថ្នាក់ដឹកនាំ និងមន្រ្តីរាជការទាំងអស់ នៃអាជ្ញាធរជាតិប្រយុទ្ធនឹងជំងឺអេដស៍ បានរៀបចំកិច្ចជួបប្រជុំប្រចាំ(ឆ្នាំសាកល) នាថ្ងៃច័ន្ទ ៨កើត ខែបុស្ស ព.ស. ២៥៦១ ត្រូវនឹងថ្ងៃទី២៥ ខែធ្នូ គ.ស. ២០១៧ ក្រោមអធិបតីភាពរបស់ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍។
ឯកឧត្តមទេសរដ្ឋមន្រ្តី បានថ្លែងរំលឹកពីសមិទ្ធផលការងារដែលអាជ្ញាធរជាតិបានបំពេញ និងបានថ្លែង អំណរគុណដល់ថ្នាក់ដឹកនាំ និងមន្រ្តីរាជការទាំងអស់នៃអាជ្ញាធរជាតិប្រយុទ្ធនឹងជំងឺអេដស៍ ដែលបានសហការចូលរួមចំណែក និង សម្រេចបានជោគជ័យយ៉ាងច្រើនក្នុងឆ្នាំ២០១៧នេះ ។
ឯកឧត្តមទេសរដ្ឋមន្រ្តី ប្រធានអាជ្ញាធរជាតិក៏បានរំលឹកអោយមន្រ្តីរាជការក្រោមឱវាទ ខិតខំប្រកាន់ខ្ជាប់ សាមគ្គីផ្ទៃក្នុង វិន័យការងារ និងបន្តរៀនសូត្រ ពង្រីកបង្កើនចំណេះដឹងជាលំដាប់តាមរយៈបច្ចេកវិទ្យាព័ត៌មានសម័យទំនើបបច្ចុប្បន្ន។
បន្ថែមលើកិច្ចការងារស្នូលរបស់អាជ្ញាធរជាតិ ឯកឧត្តមទេសរដ្ឋមន្រ្តី ក៏បានជំរាបជូនព័ត៌មាន និងស្ថានភាពសេដ្ឋកិច្ច នយោបាយ ពិភពលោក តំបន់ និងការរីកចម្រើនសេដ្ឋកិច្ច ការកាត់បន្ថយភាពក្រីក្រ និងការលើកកំពស់ជីវភាពរស់នៅ និងសុខមាលភាពរបស់បងប្អូនប្រជាពលរដ្ឋទូទាំងប្រទេស ក្រោមដំបូលសន្តិភាព និងបន្តកសាងផ្លូវថ្នល់ ការបន្តលើកំពស់គុណភាពវិស័យអប់រំជាទូទៅ ការបណ្តុះបណ្តាលជំនាញបច្ចេកទេស វិជ្ជាជីវគ្រប់វិស័យ លើកកំពស់ធនធានមនុស្ស ធនធានបញ្ញា ទាក់ទាញអោយមានការបណ្តាក់ទុន បង្កើនការវិនិយោគពីក្រៅប្រទេស សាងសង់រោងចក្រថ្មីៗ បង្កើតការងារថ្មីៗ បង្កើនការងារបន្ថែមទៀត។
ទាំងនេះជួយអោយបងប្អូនប្រជាពលរដ្ឋ ក្មួយៗយុវជន មានមុខរបរ មានអាជីព ប្រកបរបរចិញ្ចឹមជីវិត មានចំណូលកាន់តែប្រសើ រស់នៅកាន់តែងាយស្រួល និងរីកចម្រើនបន្ថែមទៀតពីមួយឆ្នាំទៅមួយឆ្នាំ។
បច្ចុប្បន្ន ក្មួយៗយុវជនកម្មករ រោងចក្រសហគ្រាស ទទួលបាន ការថែទាំសុខភាព ព្យាបាលជំងឺដោយមានរបបសន្តិសុខសង្គមជាអ្នកជួយបង់ថ្លៃជំនួស។ រាជរដ្ឋាភិបាលបានរៀបចំ និងដាក់អោយដំណើការណ៍គោលនយោបាយ ជួយអោយ ក្មួយៗជាកម្មករកម្មការី នឹង មានប្រាក់ចូលនិវត្តដល់វ័យចាស់ជរាចូលនិវត្ត។
ឯកឧត្តមទេសរដ្ឋមន្រ្តីក៏បានអំពាវនាវមន្រ្តីរាជការទាំងអស់ ជួយផ្សព្វផ្សាយអំពីសារៈសំខាន់នៃ ការដឹកនាំ និងការរក្សាស្ថេរភាពនយោបាយ អោយបានដល់សមាជិកក្រុមគ្រួសារ ក៏ដូចជាបងប្អូនប្រជាពលរដ្ឋទូទៅ អំពីសារសំខាន់នៃស្ថេរភាពសង្គម នយោបាយ និងសេដ្ឋកិច្ច ដោយគ្មានចលាចលបង្កឡើងដោយក្រុមប្រឆាំងនឹងការរីកចម្រើនរបស់ជាតិ។