នាព្រឹក ថ្ងៃព្រហសត្បិ៍ ៤ រោច ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែតុលា ឆ្នាំ២០១៩នេះ នៅទីស្នាក់ការអាជ្ញាធរជាតិប្រយុទ្ធនឹងជំងឺអេដស៍ បានរៀបចំប្រកាសតែងតាំងថ្នាក់ដឹកនាំ អាជ្ញាធរជាតិប្រយុទ្ធនឹងជំងឺអេដស៍ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិ។
ខណៈដែល ឯកឧត្តមវេជ្ជបណ្ឌិត តែង គន្ធី អគ្គលេខាធិការ នៃអាជ្ញាធរជាតិប្រយុទ្ធនឹងជំងឺអេដស៍ ត្រូវបានដាក់ឲ្យចូលនិវត្តន៍ពីមុខងារសាធារណៈ និងត្រូវបានព្រះមហាក្សត្រឡាយព្រះហស្ដលេខាតែងតាំងជាអនុប្រធានអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមឱសថការី ឈឹម ឃិនដារ៉េត ត្រូវបានតែងតាំងជាអគ្គលេខាធិការថ្មី។
តាមសំណើររបស់ សម្តេចអគ្គមហាសេនាបតី តេជោ នាយករដ្ឋមន្រ្តី ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក៏បានប្រោសប្រទានការតែងតាំងនិងតម្លើងឋានៈជូន ឯកឧត្តម ទា ផលា ជាអនុប្រធានអាជ្ញាធរជាតិ មានឋានៈស្មើរដ្ឋមន្រ្តី ហើយមន្រ្តីជាន់ខ្ពស់របស់អាជ្ញាធរជាតិជាច្រើនរូបផ្សេងទៀត ក៏ត្រូវបានតែងតាំង ជាអនុប្រធាន ទីប្រឹក្សាអាជ្ញាធរជាតិ និង ជានាយកខុទ្ទកាល័យផងដែរ។
ឯកឧត្តមទេសរដ្ឋមន្រ្តី ប្រធានអាជ្ញាធរជាតិ បានមានប្រសាសន៍ថ្លែង ការកោតសសើរ និងអរគុណ ជូនដល់ថ្នាក់ដឹកនាំ និងមន្រ្តីទាំងអស់ដែលបានចូលរួមចំណែកបំពេញការងារជូនអាជ្ញាធរជាតិប្រយុទ្ធនឹងជំងឺអេដស៍ ក្នុងបេសកកម្ម ដឹកនាំសម្របសម្រួលកិច្ចការប្រយុទ្ធនឹងជំងឺអេដស៍ សំរាប់ព្រះរាជាណាចក្រកម្ពុជារបស់យើង។
ឯកឧត្តមបានមានប្រសាសន៍ រំលឹក លើកទឹកចិត្តជូនមន្រ្តី ដែលទើបបានទទួលការតែងតាំងថ្មី សូមបន្តចូលរួមចំណែកអោយបានសកម្មថែមទៀត ព្រោះថាកិច្ចការបង្កាការឆ្លងរាលដាល និង ឆ្លើយតបទៅនឹងមេរោគអេដស៍ និងជំងឺអេដស៍ ត្រូវការចលនាចូលរួមគ្រប់ពេលវេលា គ្រប់វិស័យ គ្រប់បុគ្គល និងគ្រប់ទីកន្លែងជាចលនាជាតិដែលមាននិរន្តរភាព បើទោះជាព្រះរាជាណាចក្រកម្ពុជាបាន ទទួលជោគជ័យច្រើនហើយក៏ដោយ ក៏ការឆ្លងរាលដាលមេរោគអេដស៍ អាចនឹងស្ទុះខ្លាំងឡើងវិញបើសិនជា យើងម្នាក់ៗខ្វះការប្រុងប្រយ័ត្ន ។
ព័ត៌មានផ្សព្វផ្សាយនៅទូរទស្សន៍ អប្សរា www.youtu.be/TWfU28aiZMs
ព័ត៌មានផ្សព្វផ្សាយនៅទូរទស្សន៍ ទទក www.youtu.be/O0iBciZvcbA